Զրույց-հանդիպում երաժշտական թատրոնի թեմայով

Ս. թ. ապրիլի 19-ին «Վարդուհի» արվեստի դպրոց այցելեց Երեւանի Կոմիտասի անվան կոնսերվատորիայի պրոֆեսոր, հայտնի երաժշտագետ Արմեն Բուդաղյանը: Վերջինիս ներկայացնելով՝ դպրոցի ուսմասվար Նվարդ Եղոյանը ընդգծեց վաստակաշատ դասախոսի դերն ու հետեւողական աշխատանքը հատկապես մատաղ սերնդի գեղագիտական դաստիարակության գործում:Պրն. Բուդաղյանը նախ ծանոթացավ նորաբաց դպրոցի ուսումնական հնարավորություններին, քանի որ առաջին անգամ էր լինում այստեղ: Նա ուշադրությամբ դիտեց երկու հարկերում գործող գեղանկարչական ցուցահանդեսը, ապա դպրոցի համերգասրահում բոլոր բաժինների սաների ու ուսուցիչների առջեւ հանդես եկավ զրույց-դասախոսությամբ՝ նվիրված երաժշտական թատրոնին: Նա հակիրճ ներկայացրեց 2 արվեստների՝ երաժշտություն եւ թատրոն, համադրությամբ կազմված այդ գեղարվեստական երեւույթը, խոսեց դրա գեղարվեստական առանձնահատկությունների մասին, ապա խոսքը մասնավորեցրեց Արամ Խաչատրյանի «Սպարտակ» բալետի վրա: Հետաքրքիրն այն էր, որ բալետի լիբրետոն երեխաներին հասու դարձնելու նպատակով հարգարժան պրոֆեսորն օգտագործեց թատերական ատրիբուտիկայի տարրեր (ձեռնոցներ, սուսեր, թիկնոց եւ այլն) եւ այդ կերպ երաժշտությունը դարձրեց առավել հասկանալի ու «տեսանելի»:

ՀՀ վարչապետի այցը «Օյունջյան» հիմնադրամ

2017թ. մարտի 26-ին Գյումրի կատարած այցի շրջանակներում ՀՀ վարչապետ Կարեն Կարապետյանը ծանոթացավ «Օյունջյան» բարեգործական հիմնադրամի աշխատանքներին:

Այդ նպատակով նա այցելեց «Վարդուհի» արվեստի դպրոց, դիտեց վերջինիս գեղարվեստի բաժնի սաների ցուցահանդեսն ու հիացավ պարարվեստի բաժնի փոքրիկների պատրաստած բալետային ելույթով: Ապա վարչապետը եղավ հարեւանությամբ կառուցվող «Աղավնի» արհեստի դպրոցի շինհրապարակում եւ հետաքրքրվեց շինարարական աշխատանքների ընթացքով:

Չորս դափնեկիր՝ մեկ մրցույթում

«Վարդուհի» արվեստի դպրոցի սաները շարունակում են իրենց հաղթարշավը հանրապետական ու միջազգային մրցույթ-ստուգատեսներում: Վկայությունը մեր աշակերտների փայլուն ելույթներն էին օրերս՝ մարտի 11-ապրիլի 2-ը Երեւանի Սարաջեւի անվան երաժշտական դպրոցում անցկացված ‘’Art Music’’ արվեստի 8-րդ մրցույթ-փառատոնում:

Բանն այն է, որ արդեն ութերորդ տարին ‘’Image Art Studio’’ պրոդյուսերական կենտրոնը ողջ տարվա ընթացքում դպրոցահասակ երեխաների (7-17տ.) շրջանում կազմակերպում է մրցույթներ տարբեր անվանակարգերում՝ երաժշտություն, ասմունք, նկարչություն, կիրառական արվեստ եւ այլն: Ու որպես ամփոփում տեղի է ունենում ‘’Art Music’’ը, որի շրջանակներում կարծես մեկտեղվում են նշյալ բոլոր անվանակարգերը՝ երեւան հանելով հաղթողներին:

Մտադրություն՝ փոխված Արվեստի դպրոցի շնորհիվ

«Օյունջյան» վարժարանի 8-րդ դասարանցի Կարոլինա Եգանյանը ուսման գերազանցիկ է: Սիրել ու սիրում է բոլոր առարկաները, գրականությունն՝ առավել: Ուստի դեռ տարիներ առաջ որոշել էր գրականագետ դառնալ: Ամեն ինչ, սակայն, փոխվեց «Վարդուհի» արվեստի դպրոց մուտք գործելով: Ինքն էլ երեւի չէր պատկերացնում, թե որքա՜ն լավ է նկարում: Այդ ամենը նկատեց նրա նկարչության առաջին ուսուցիչը՝ Զոհրապ Մկրտչյանը:

Գարնանաշունչ համերգ

Այս տարվա գարունն անհասկանալի պատճառներով ուշացավ: «Այն արագացնելուն» կոչված միջոցառումներից կարելի է համարել «Վարդուհի» արվեստի դպրոցում մարտի 28-ին տեղի ունեցած համերգը՝ «Գարնանային հանդիպում» խորագրով:

Իսկ եթե ավելի լուրջ, ապա հիշյալ համերգն իր գարնանաշունչ ծրագրով եկավ ազդարարելու տարվա այդ եղանակի մուտքը մեր արվեստի օջախ: Այն միաժամանակ բարեկամության համատեղ համերգ էր, որին բացի «Վարդուհի» արվեստի դպրոցի սաներից մասնակցում էին պարման-պարմանուհիներ Չարենցավանից, Արմավիրից եւ մայրաքաղաք Երեւանից: Համերգի նախաձեռնության հեղինակը քանոնի դասատու Մարինե Ասատրյանն էր, ով հղացել էր նման միացյալ համերգ կազմակերպելու գաղափարը:

Ընտանեկան ավանդույթները շարունակվում են

«Վարդուհի» արվեստի դպրոցի երաժշտական բաժնի 6-րդ դասարանցի Մարիամ Ժամակոչյանը ծնվել է 2002-ին Գյումրիում, երաժիշտների ընտանիքում:

Հայրը՝ Սուրեն Ժամակոչյանը, քաղաքում հայտնի դաշնակահար ու կոնցերտմայստեր է, իսկ մայրը՝ Նվարդ Եղոյանը, դասախոսում է Երեւանի Կոմիտասի անվան կոնսերվատորիայի Գյումրու մասնաճյուղում: Հենց նրա հետ զրույցից էլ տեղեկացա, որ Մարիամիկն արդեն 6 տարեկան հասակում լսողությամբ է սկսել դաշնամուր նվագել՝ ընդօրինակելով ավագ քրոջը:

Խոստումնալից աշակերտուհին

՛՛Վարդուհի՛՛ արվեստի դպրոցի դաշնամուրային բաժնի 2-րդ դասարանում սովորող այս գեղադեմ սանուհին արդեն նկատվել էր նույն դպրոցի հաշվետու համերգների ժամանակ. բեմական գեղեցիկ պահվածքը համընկնում էր գրագետ նվագի հետ:

Տպավորիչ էր Մերիի կատարումը նաեւ Երեւանում՝ ՛՛Առնո Բաբաջանյան՛՛ դահլիճում կայացած ցուցադրական համերգի ժամանակ: Այդ կատարումը գնահատվեց ՀՀ Շիրակի մարզպետարանի Շնորհակալագրով՝ ՛՛Մենք ենք մեր մարզերը՛՛ մանկապատանեկան մարզային մշակույթի օրերը մայրաքաղաքում՛՛ ծրագրին լավագույնս մասնակցելու համար՛՛:

Ցուցահանդես՝ նվիրված Հայոց բանակի կազմավորման 25-ամյակին

2017թ. հունվարի 28-ին Գյումրու «Վարդուհի» արվեստի դպրոցում բացվեց սաների եւ ուսուցիչների աշխատանքների միացյալ ցուցահանդեսը՝ նվիրված հայոց բանակի քառորդդարյա հոբելյանին: Ընդհանուր առմամբ, ցուցադրված էին սաների մոտ հարյուր գեղանկարչական եւ 14 քանդակագործական ու խեցեգործական աշխատանքներ, ինչպես նաեւ գեղարվեստի բաժնի դասատուներ, ՀՀ վաստակավոր նկարիչ Սամվել Լաճիկյանի, Սամվել Պողոսյանի, Զոհրապ Մկրտչյանի, Վահագն Պապոյանի ու Լեւոն Լաճիկյանի ստեղծագործությունները: